Aínda que a campaña electoral non comezou oficialmente, tal e como prometimos en Xornal Aberto imos comezar co ranking de inauguracións. A actividade estes días de Nadal anda baixa e tan só a magnífica conselleira de Política Territorial, a señora María José Caride, fixo unha inauguración propiamente dita: a de un novo enlace a autovía O Porriño-Tui. Parece que a conselleira, que como contaban o outro días os compañeiros de Xornal de Galicia levaba sete inauguracións dende principios deste mes, quere ser a gañadora absoluta e non parece dar tregua aos seus perseguidores. Pola súa parte, o presidente ("Smallbull") e o vicepresidenten ("Quin") están a facer as cousas con máis tino e, en vez de facer inauguracións propiamente ditas, o que fan e "visitas" a sitios que, en breve, estarán en funcionamento. Algo así como "inauguracións encubertas". Deste xeito, o presidente da Xunta estivo o pasado sábado de "visita" na sede da que será a Escola Superior de Arte Dramático de Vigo. Parece ser que a obra non terá lista a súa primeira fase ata marzo ou abril do ano que ven e, dese xeito, non poderá inaugurarse a tempo para as eleccións así que o presi foi de "visita" o sábado para poder sacarlle algo de rédito electoral. O noso querido "Quin", pola súa banda, estivo tamén de visita o pasado domingo, no que será o novo Centro de Día de Pantón, que entrará en funcionamento tralo Nadal. Vese que o das "visitas" vai a ser a saída que tomen os nosos políticos para non ir a inauguracións. Claro, en vez de facer inauguracións facemos visitas e en vez de cortar cintas poñemos os cascos e ninguén nos poderá criticar, pensarían os nosos políticos. Bueno, todos menos á Caride que, visto o visto, non ten pensado nin cambiar o estilo inauguración por visita. Seguiremos informando.