Unha das cousas que aprendimos o pouco de chegar a Dumfries é que a policía por estas terras chámase police e non Scotland Yard. O motivo é que Scotland Yard é o nome que recibe a policia metropolitán da capital inglesa, aos que se lles coñece como "bobbies" porque, alá polo 1829 e sendo Sir Robert Peel ministro do Interior foi cando aprobouse a lei que estableceu a primeira policía metropolitán. Como o nome do ministro era Robert, que ten en Bob o seu diminutivo, a xente da época comezou a chamarlles bobbies, algo así como os fillos de Bob, e quedoulles.

Como adoita a acontecer, unha resposta xera unha nova pregunta e, neste caso, a cuestión parece evidente: se a Scotland Yard é a policía do Greater London por que recibe ese nome? Sabemos pouco inglés pero temos claro que Londres non está en Scotland e que a yarda é unha unidade para medir distancias. Pouco que ver, aparentemente, cun alcume para a policía londinense.

Poderíamos solventar esta dúbida como o fixemos co dos "bobbies", preguntándolle ao google pero, xa que estamos por terras escocesas, decidimos baixar ao pub para preguntarlle a un nativo porque, deste xeito, non só averiguaríamos a resposta senón que ademais o faríamos "improving our english" e, o que é máis importante, "drinking a pint of Guinness".

Despois de dúas rondas de observacion, escollimos entre a parroquia que a esas horas apagaba a súa sede no local a un home de mediana idade que estaba na barra lendo un xornal. Coa excusa de pedir outra ronda achegámonos a el e, en canto escoitounos pedir co noso inglés da "Terra Cha", sorriu e xirouse cara nós co habitual comentario escocés sobre o tempo, o cal, como xa comentamos nalgún post anterior, é o xeito que teñen os Scottish, alomenos os de Dumfries, de iniciar unha conversa.

E así foi. Tralos comentarios sobre o tempo e as pesquisas habituais sobre o noso país natal e o motivo da visita a Scotland, chegou o tempo de buscar a excusa para plantexarlle a cuestión que levounos ao pub, ademáis das gañas de Guinness. O xornal que estaba a ler o paisano, como tantas outras veces, deunos a clave. En portada había unha gran foto de Madelaine, a nena inglesa desaparecida hai tempo en Portugal, e as palabras Scotland Yard aparecían en repetidas ocasións no corpo da información. Tras un par de comentarios sobre a noticia, que estes días está en boca de todo o mundo en UK porque ao parecer hai novas pistas sobre o caso, puidemos preguntarlle por fin o que queriamos averiguar.

Resulta que, segundo lle puidemos entender a Dave -así chamábase o noso contertulio-, a primeira sede da policia metropolitán e London estaba no número 4 de Whitehall Place e que a parte traseira do edificio daba a unha calle, ou patio, ou algo así , chamado "The Great Scotland Yard" (parece ser que porque alí estaba situada a residencia do rei de Scotland na capital inglesa). E por isto foi polo que a policía metropolitán comezou a chamarse popularmente Scotland Yard, polo seu lugar de ubicación. E de aí aos nosos días.

A conversa con Dave foi do más agradable ata o punto que, de regreso a casa, decidimos que nunca buscaríamos en internet a orixe do nome de Scotland Yard e que, para nós, sempre sería como o contou Dave porque, ás veces, unha boa historia é millor que unha gran verdade.