Por se alguén anda despistado quero aclarar que, no excelente comentario realizado por Thomas Pullings no post anterior sobre o artificial e cacareado "problema lingüístico" en Galiza, califícase a Don Manuel Fraga, nun momento dado, como dunha especie de "Cid Campeador, que gana batallas tras a súa morte política". O motivo desta comparación, que demostra unha vez máis o ben informados que están os lectores de Xornal Aberto, non é outro que o feito de que o PPdG está a utilizar a imaxe do ex-presidente como gancho político na campaña de ultramar. Aínda que pareza mentira é certo. Os "populares", sempre dispostos a todo, están a empapelar os autobuses bonaerenses con imaxes do señor Fraga, nun intento máis de manipular o voto dos emigrantes. Como alguén pode pensar que isto non é máis que un invento de "nacionalistos", "izquierdosos", "titiriteros" e cousas polo estilo, nada mellor que mirar para a foto que ilustra este post. E ademais é que parece que Fraga lle está a explicar a Feijóo como ten que facer as cousas, cando o actual candidato popular non quere ver ao vello nin en pintura...Que lle estará explicado? Como colgar nacionalistas?