18 de xullo de 2007
Tal e como anunciaba onte Xornal Aberto, as obras da cementeira de Coirós reanudaránse en breve tras obter a autorización ambiental integrada (AAI) da Consellería de Medio Ambiente e a declaración de impacto ambiental (DIA). Despois das protestas e movilizacións levadas a cabo polos veciños da zona, integrados na Asociación de Afectados pola Cementeira de Coirós e apoiados en todo momento polo BNG do concello, parece ser que, a pesares da súa loita, a obra seguirá adiante. Dende Xornal Aberto falamos hoxe con Pura Ferreño, a responsable do BNG no concello de Coirós, pedíndolle unha valoración sobre esta nova situación. Ferreño respondeunos que "a pesares de non estar contentos porque o obxectivo final das movilizacións veciñais era que a cementeira non se instalara onde vai a estar, hai que facer unha valoración positiva da nova situación xa que, segundo o novo proxecto presentado pola empresa, vaise facer un investimento de 3 millóns de euros para correxir os diferentes defectos que tiña o proxecto orixinal". Sobre este punto, Pura indicou que hai que facer fincapé en que "sen as movilizacións veciñais levadas a cabo, a cementeira instalaríase en Coirós segundo o proxecto incialmente proposto e que, para o alcalde desta localidade, estaba perfecto e correcto tal e como se presentara incialmente, a pesares das modificacións levadas a cabo agora". Para Ferreño é evidente que o principal mal da instalación da cementeira en Coirós (a escasa distancia das instalacións con nucleos habitados) non está resolto pero, polo menos, conseguiuse que, co novo proxecto, se reduza o impacto medioambiental da cementeira.
Canto os seguintes pasos a dar, a concelleira do BNG en Coirós afirmou que haberá unha reunión cos representantes da Asociación de Afectados pola Cementeira de Coriós para decidir cales serán as novas medidas a tomar pero que, en todo caso, a nova situación non é "un cheque en branco" para a empresa. Segundo Ferreño, o máis importante de todo este proceso foi que "as movilizacións veciñais deron froito" e permitiron que a empresa responsable da instalación en Coirós da cementeira tivese que realizar un investimento de 3 millóns de euros para mellorar o proxecto incialmente presentado e aprobado, no seu momento, polo alcalde deste concello coruñés.
Canto á súa opinión sobre a actuación da Consellería de Medio Ambiente no caso da cementeira, Ferreño expresoulle a Xornal Aberto o seu "resquemor" coa Consellería xa que, cando recibiron as alegacións contra o proxecto inicial da obra non fixeron nada porque, hai que lembrar, que a obra detívose pola intervención do Xulgado de Betanzos e non da Consellería. En resumo, a posición do BNG de Coirós enmárcase dentro da satisfacción polas melloras acadadas sobre o proxecto incial pero partindo de que o obxectivo final de todas as protestas (instalar a cementeira noutro lugar) non se acadou. Iso sí, como ben lembra Pura "sen as movilizacións veciñais non se houbera conseguido nada".
Publicar un comentario