Xa pasou o día do Apóstolo. Eu, a verdade, escapei de Compostela como levo facendo os últimos anos. É demasiada a xente que ven a pasar esa fin de semana a capital de Galiza e un comeza a estar vello para estas cousas. Ademais, xa bastante noxo me deu velo pola tele como para estar na mesma cidade. Non sei que pensades vos, pero que nun estado "aconfesional" como se supón que é España é ben triste ver como o xefe do estado -para máis inri un rei- lle pida ao apóstolo que solucione os problemas que ten España (a crise e esas cousas). A verdade é que sinto vergoña cando vexo ao xefe do estado pedirlle a un anaco de pedra que solucione as cousas. Non teño palabras.

Pero se iso me da noxo, non sei se me da todavía máis ver ao alcalde de Compostela -o socialista Bugallo- pedirlle tamén ao apóstolo que axude a solucionar as cousas. Ver a un socialista nesta tesitura tamén me da que pensar.

Por outra banda aproveito, aínda que sexa brevemente, para lembrarlle aos nosos queridos lectores que en breve -concretamente no mes de novembro- o xefe dos curas, ese que chaman Benedicto, vai a estar en Compostela de peregrinación. Sobre esta visita dicir só dúas cousas: a primeira, que a gracia vai costar entre 2 e 4 millóns de euros e que vai sair dos MEUS, TEUS, NOSOS, impostos; a segunda que, ás poucas horas de que se anunciase a visita papal os hoteis de luxo de Compostela xa non tiñan praza. Como ben comprenderedes non creo que os nosos impostos, os dun Estado como o noso, teñan que server para pagar estas cousas. Se os católicos queren que veña o cura ese que o paguen eles do seu peto. Iso si, parece que a visita do papa serviu para algo bo: serviu para que comezase unha campaña de rexeitamento da visita papal que se aglutina baixo unha bandeira que xa colga de moitos balcóns composteláns. Eu nom te espero!!