8 de outubro de 2007
O pasado venres, despois de que levara unha semana en cartel, acudín ao Salón Teatro santiagués a presenciar a nova produción do Centro Dramático Galego (CDG), Noite de Reis do director, Quico Cadaval. A montaxe da compañía pública combina un divertido xogo de enredos, contratempos, malentendidos, enganos e desenganos con apaixonantes historias de amor e desamor. A verdade é que a obra gustoume moito tanto no referido á parte artística (espazo escénico, música, maquillaxe ou vestiario) como ao elenco de actores encargado de representar esta nova versión do texto de Shakespeare. Rebeca Montero, María Bouzas, Xosé Manuel Olveira Pico, Marcos Orsi e Marcos Correa encabezan o elenco de 10 actores e actrices -Susana Dans, Víctor Mosqueira, Xan Cejudo, Borja Fernández, Simone Negrín- e no que tamén participan os músicos Bernardo Martínez, Suso Alonso e Ramón Orencio. A obra en sí mesma é unha comedia mediterránea sobre o amor e as tolemias e baballadas que este nos leva a facer. A acción comeza cando Sebastián (Borja Fernández) e Violeta (Rebeca Montero), irmáns xemelgos, naufragan ante a costa de Iliria. Violeta consegue chegar case sen vida á praia coa axuda de Festas (Victor Mosqueira) -bufón da corte do duque Orsino (Marcos Correa). Ela cre que Sebastián morreu. Vestida de home e facéndose pasar por un paxe novo co nome de Cesario, pasa a servir na corte do duque Orsino que está "poética, apaixonada e desesperadamente namorado" da aflixida Lady Olivia (María Bouzas), que o rexeita continuamente.
A pesares da hora e media larga que dura a representación, o tempo pasa volando para o espectador que disfruta en todo momento cun espazo escénico moi sinxelo e dinámico e cun texto moi ben traballado por Quico Cadaval. Entre o elenco de actores destacan, por enriba do resto, Marcos Orsi (Malvolio), Victor Mosqueira (Festas) e Marcos Correa (Duque Orsino) que interpretan, cun elevado grao técnico, tres papeis diametralmente opostos pero todos cargados dunha grande complexidade interpretativa. Tamén están excelentes María Bouzas (Lady Olivia) e Rebeca Montero (Violeta) nos seus respectivos papeis.
En resumo, unha excelente opción para ver teatro de calidade na capital de Galiza que estará no Salón Teatro durante todo o mes de outubro e que, posteriormente, estará en diversas cidades galegas. Noite de Reis, poderá verse en Santiago os mércores e xoves ás 11.00 horas en funcións para institutos. As funcións para o público xeral terán lugar ás 20.30 horas os venres e sábados, e ás 18.00 horas os domingos. As entradas poranse á venda no despacho de billetes do Salón Teatro desde dúas horas antes do comezo do espectáculo. O prezo das localidades é de 10 € para os venres e os sábados, cun desconto do 40% para estudantes, usuarios de carné xoven e maiores de 65 anos, e de 5 € para o domingo, día do espectador.
Pois si, unha boa opción, a min tamén me gustou moito.
a verdade é que está moi ben...