13 de febreiro de 2007
Ares é un pequeno concello do norte da provincia de A Coruña, no que, nas vindeiras eleccións municipais, terá lugar un enfrontamento, cando menos, estrano: o actual alcalde, o popular José Manuel Cendán, terá que enfrontarse nestes próximos comicios, ademais de ao candidato do PSdG e do BNG, ao seu IRMÁN XEMELGO, Luis Cendán, que presentarase como candidato dun novo partido chamado NAL (Nueva Alianza). A cousa é rara abondo pero, para complicala máis, hai que dicir que Luis Cendán, o irmán do alcalde, era ata hai nada concelleiro de Facenda, Policía Local, Réxime interno, Protección Civil e Turismo (o superconcelleiro) no goberno do seu irmán e, ademáis, a lista que presentará o novo partido ás municipais é a mesma que presentou o PP nas eleccións de 2003, pero sen o actual alcalde. O PPdG apoia ao actual alcalde e o presidente provincial, Juan Juncal, califica de "aventura independente e en solitario" a candidatura de Luis e afirma que o seu partido "o lamenta, pero no PP estamos por un interese colectivo" e non individual. Estou convencido que se o PPdG monta un circo crécenlle os ananos. Seguro.
Os motivos que impulsaron a Luis a loitar por desbancar ao seu irmán do cargo de alcalde son, segundo el mismo comentaba, "porque José Manuel non é o candidato adecuado, evidencia desgaste, o seu mandato é cuestionado dentro do propio partido e o pobo apoianos". Para saber máis desta loita fraticida é bo que consultedes blogs como A voz de Chanteiro, entrevistas como a publicada polo Diario de Ferrol ao candidato do Nal ou artigos sobre o tema como este publicado na Voz. En Xornal Aberto, de tódolos xeitos, prometemos seguir este peculiar enfrontamento electoral con detenemento. Seguiremos informando.
Publicar un comentario