18 de xaneiro de 2007
Se no seu momento homes como Castelao conseguiron que Galiza entrase, aínda que fose no último minuto, no vagón de cabeza do desenvolvemento autonómico do Estado e esto posibilitou, xunto coa labor dos políticos da transición democrática, que Galiza puidese ter un estatuto dos considerados de "primeira liña" así como a consideración de "nacionalidade histórica", hoxe, a incapacidade de chegar a acordos políticos entre os líderes dos tres partidos con representación parlamentaria en Galiza, pode tirar todo ao traste. O fracaso da reunión de onte, xunto cos esforzos que están a realizar o resto de comunidades autónomas para reformar os seus respectivos textos estatutarios, traerá como consecuencia que as comunidades que non consigan levar a cabo a reforma a tempo (goberno Zapatero) quedarán relegadas a unha segunda división na que Galiza non merece estar. Comunidades como Andalucía, que no seu momento non conseguiron entrar na primeira división do desenvolvemento autonómico, aprenderon dos seus erros e neste novo proceso estatutario apuraron os acordos para, deste xeito, tratar de situar a súa comunidade no vagón de cabeza. Outros, como Galiza, non aprendemos nunca. Qué solución temos?
A miña proposta ao respecto é que se o responsable de non chegar a acordo é o PPdG (como din o resto de partidos), o PSdeG e o BNG deben chegar a un acordo e, a continuación, levar este acordo ao Parlamento Galego. Antes de que o texto chegue ao Parlamento, o goberno deberá facer unha campaña de información á cidadanía do novo texto autonómico proposto, así como unha explicación ás claras do que supón para Galiza non reformar agora o estatuto. Tamén deberán explicarlle á xente por qué Galiza non pode ter a mesma consideración no Estado que Cataluña ou qué pasaría co Estatuto galego se Zapatero perdese as próximas eleccións estatais.
Unha vez feito isto, o goberno levará o seu novo texto estatutario ao Parlamento para a súa votación e se Feijoo e o seu partido deciden votar en contra, como parece probable, o goberno galego poderá explicarlle á cidadanía quen é o responsable de que Galiza non teña novo estatuto e "descenda" á segunda división autonómica.
Independentemente do que decidan facer os partidos, parece claro que retrasar a reforma do Estatuto pode ser "fatal" para Galiza. Ademais do retraso no proceso, un estatuto como o galego ten que reclamar para a nosa terra, sempre adaptándose as nosas peculiaridades, o mesmo que os estatutos máis avanzados competecialmente como o catalán. Por que menos?
Publicar un comentario